Same here!

Aaj main biscuits lene Dilli ki Bangali market gaya.
Do din pehle liye the us dukaan se lekin wahin bhool aaya tha. Toh aaj phir se gaya tha.

Dukaan mein gaya aur manager se kaha woh biscuit ka 250 gram ka dabba reh gaya tha do din pehle, usi raat phone karke bataya tha. Usne apne worker se poochha aur kaha haan reh gaya tha. Dekh lo kounse the aur bata do. Maine apni baayin aur rakhe kaanch ke fridge ki aur ishara kiya aur kaha wahan, upar. Abhi ishara karke baazu neeche bhi nahi kari thi toh meri nazar unpar padhi.

Kya yeh wohi hain? Sachi?

Main us aur gaya aur dobara gaur se us mez par baithe unko dekha. Wohi hain shayad. Mez ki doosri aur dekha aur unki biwi bhi baithi thin. Yeh wohi hain.

Main unki aur gaya aur poochha Vishal ji?
Jawab aaya ‘ji’.

Main muskuraya jaise ek bacha apne kisi anjane rishtedaar ke khilona laane par khush hokar muskurata hai. Maine apna haath milane ke liye aage badhaya.

Unhone apni dono muthiyaan band kar li aur aankhon ke ishare se mez par padhe khaane ki aur dekha aur kaha ‘sorry mere haath abhi saaf nahi hain’. Main unki aur unki biwi ki aur dekh kar muskuraya. Achanak maine poochh dala ki aap dilli mein kya kar rahe hain? Unhone halke se muskurate hue kaha ‘woh national award ke silsile mein’. Maine kaha ki main ab aapko aur disturb nahi karta, aap khana khaiye. Yeh keh kar maine biscuit ka dabba liya aur bahar nikal gaya.

Socha ki thoda ruk jaata hoon. Woh khakar bahar aayenge toh mil leta hoon. Lekin kya baat karunga?
Ek din maine apne dost jo ki radio mein kaam karte hain unse kaha tha ki kabhi Vishal se milte hain, baithte hain, baatein karte hain. Lekin abhi us dukaan ke bahar khade hokar mujhe kuchh nahi soojhh raha tha. Shayad aisa hi hota hai sabhi ke saath aksar jab achanak aise hi koi mil jaata hai.

Main dhoop mein khada sochta raha. Kuch baat karne ke liye thi hi nahi. Phir socha ki unko hi kehne doonga. Shayad woh poochhenge ki kya karte ho tum jispar main kahunga ki kuchh aap jaisa hi kaam karta hoon ya shayad karne ki koshish karta hoon. Phir shayad baaton ka rukh tay ho jayega.

Kaafi der ho gayi. Ab tak toh khana khatam ho gaya hoga. Shayad meetha kha rahe honge. Yeh dukaan mithai ke liye hi toh mashhur hai aakhir. Andar jaun kya? Lekin agar kha rahe honge phir kya? Nahi, nahi yahin thaerta hoon kuchh der aur.

Woh bahar aaye aur peechhe peechhe unki biwi bhi. Cigarette ka kash lagaya, jaisa log aksar karte hain khaane ke baad, yeh maine apne doston se jaana tha. Kaala chashma daala apni ankhon par aur shayad apni taxi ka intezaar kar rahe wahin khade the.

Main phir unke paas gaya. Abki ankhein nahi dikhi unki lekin maine us kaale chashme mein apni hi parchayi ko dekhte hue kaha ki kya ab haath mila sakte hain?

Unhone haath aage badhaya aur unki taxi humare peechhe sadak par aakar khadi ho gayi. Humne haath milaya aur muskuraye. Woh taxi ki aur badhe aur halka sa paltte aur kaha ‘nice to meet you’ aur chal diye. Maine phir muskuraya aur maine mann mein kaha ..

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s